Main Uske Wasl Se Jaga to Silsila Tha Wahi

main us ke vasl se jaaga to silsila tha vahi

ki hijr us ka tha vaisa hi marhala tha vahi

dukan-e-shisha-garan bhi saja.i thi us ne

tamam shahr men patthar bhi banTta tha vahi

mujhe guman ke sab raste usi ne diye

mire yaqin ke diye bhi jala raha tha vahi

visal us ka baratna tha hijr likhna bhi

ki tez dhuup men barish ka rasta tha vahi

parinde dhuup ki shiddat se ghar ke angan men

palaT ke aa.e to dekha ki mas.ala tha vahi

vo ik yaqin se jaata tha chhoḌ kar mujh ko

nibahne ka magar dil men hausla tha vahi

na.e visal ke mausam men jo badan bhiga

hujum-e-hijr men dekha to jal raha tha vahi

main jis ki rahon se vapas palaTne vaala tha

nazar uTha.i to ik roz aa raha tha vahi

main apne ḳhvabon ki dastak se jaag uTha ‘adil’

bahut si raten thiin aur sab men rat-jaga tha vahi