kis se azurda mire qatil ka ḳhanjar ho gaya
kya hua jo aaj yuun jaame se bahar ho gaya
mera shohra aaj ik aalam men ghar ghar ho gaya
tere hathon mujh ko qatil ye mayassar ho gaya
kyuun nahin milta abhi tak tishna-lab hain bada-ḳhvar
kya tira saghar bhi saaqi jam-e-kausar ho gaya
is qadar vahshat bhi ai dast-e-junun kis kaam ki
tere hathon mera jiina bhi to dubhar ho gaya
josh-e-vahshat ka irada tha ki uryan hi rahe
baare mar kar ik kafan mujh ko mayassar ho gaya
us ki rusva.i ka bhi aaya na tujh ko kuchh ḳhayal
kis qadar bebak tu ai dida-e-tar ho gaya
muzhda ai ganj-e-shahidan tere bhi din phir ga.e
aaj dil-bardashta duniya se ‘jauhar’ ho gaya
Leave a Reply