jurm-e-ummid ki saza hi de
mere haq men bhi kuchh suna hi de
ishq men ham nahin ziyada talab
jo tira naz-e-kam-nigahi de
tu ne taron se shab ki maang bhari
mujh ko ik ashk-e-subh-gahi de
tu ne banjar zamin ko phuul diye
mujh ko ik zakhm-e-dil-kusha hi de
bastiyon ko diye hain tu ne charagh
dasht-e-dil ko bhi koi raahi de
umr bhar ki nava-gari ka sila
ai khuda koi ham-nava hi de
zard-ru hain varaq khayalon ke
ai shab-e-hijr kuchh syahi de
gar majal-e-sukhan nahin ‘nasir’
lab-e-khamosh se gavahi de