Tilok Chand Mahroom
pahlu men dil hai dard ki duniya kahen jise
par is qadar ujaaḌ ki sahra kahen jise
vo ro.ab-e-husn tha ki ban aa.i na ham se baat
yuun hal-e-dil kaha ki na kahna kahen jise
ankhon se dekhne ko to ab bhi hain dekhte
thi aur chiiz zauq-e-tamasha kahen jise
manind-e-mah us ka falak par dimagh ho
jhuTon bhi tab-e-husn men tum sa kahen jise
sab aap ke taghaful-o-jaur-o-jafa baja
hai ek apna shikva ki be-ja kahen jise
zauq-e-suḳhan ke din bhi the shayad vahi ki jab
dil men kasak thi dard-e-tamanna kahen jise
‘mahrum’ sha.iron men bahut namvar nahin
itna zarur hai ki sab achchha kahen jise
Leave a Reply