Majburiyan

main aahen bhar nahin sakta ki naghme ga nahin sakta

sakun lekin mire dil ko mayassar aa nahin sakta

koi naghme to kya ab mujh se mera saaz bhi le le

jo gaana chahta huun aah vo main ga nahin sakta

mata-e-soz-o-saz-e-zindagi paimana o barbat

main khud ko in khilaunon se bhi ab bahla nahin sakta

vo badal sar pe chhae hain ki sar se hat nahin sakte

mila hai dard vo dil ko ki dil se ja nahin sakta

havas-kari hai jurm-e-khud-kushi meri shariat men

ye hadd-e-akhiri hai main yahan tak ja nahin sakta

na tufan rok sakte hain na andhi rok sakti hai

magar phir bhi main us qasr-e-hasin tak ja nahin sakta

vo mujh ko chahti hai aur mujh tak aa nahin sakti

main us ko pujta huun aur us ko pa nahin sakta

ye majburi si majburi ye lachari si lachari

ki us ke giit bhi dil khol kar main ga nahin sakta

zaban par be-khudi men naam us ka aa hi jaata hai

agar puchhe koi ye kaun hai batla nahin sakta

kahan tak qissa-e-alam-e-furqat mukhtasar ye hai

yahan vo aa nahin sakti vahan main ja nahin sakta

haden vo khinch rakkhi hain haram ke pasbanon ne

ki bin mujrim bane paigham bhi pahuncha nahin sakta

Leave a Comment