Jo KHun Roti Hai Aankhen Sara Manzar chiKH uThta Hai

Arpit Sharma Arpit

jo ḳhuun roti hai ankhen saara manzar chiḳh uThta hai

bichhaḌ kar mujh se koi mere andar chiḳh uThta hai

kya us ka dard hai kya gham hai koi us se puchhe to

ek aisa shaḳhs hai raton ko uTh kar chiḳh uThta hai

use hai ḳhuub dard-e-dil ki gahra.i ka andaza

ye aansu dekh kar mera samundar chiḳh uThta hai

bhari duniya men tanha be-sahara dekh kar ḳhud ko

koi ma.asum rota hai to patthar chiḳh uThta hai

tere hone se divali hai mere ghar men har ik din

har ik pal tere jaane ka jo ye Dar chiḳh uThta hai

kisi pal bhi nahin rahta tiri ḳhushbu se ye ḳhali

nahin hota hai tu ghar men to ye ghar chiḳh uThta hai

tu apne saath jab se le gaya tasvir bhi apni

dar-o-divar rote hain ye bistar chiḳh uThta hai

juda ho kar bhi insha ki mohabbat us ke dil men hai

kisi par zulm hota hai qalandar chiḳh uThta hai

teri yadon ki ye bad-e-saba jab ḳhuun roti hai

mera vahm-o-guman aur dil ka khanDar chiḳh uThta hai

jahan hote ho tum dekho gulabi shaam hoti hai

tumhara zikr hote hi november chiḳh uThta hai

kisi se bhi koi shikva nahin ‘arpit’ mujhe phir bhi

mere dil ka ye sannaTa bhi aksar chiḳh uThta hai