bacha tha ek jo vo rabta bhi TuuT gaya
ḳhafa jo ḳhud se hue aa.ina bhi TuuT gaya
faza.en laakh bula.en uḌaan kaise bharen
paron ke saath hi jab hausla bhi TuuT gaya
us ek peḌ ke dar pe thiin andhiyan kya kya
ki us ke TuTte zor-e-hava bhi TuuT gaya
parinde DhunDte phirte hain phir se ja-e-aman
shajar ke saath hi har ghonsla bhi TuuT gaya
‘shafiq’ vo to bana hai ajiib miTTi se
ki de ke dastaken sang-e-sada bhi TuuT gaya
Leave a Reply