Dekhna Hai Kab Zamin Ko Khaali Kar Jata Hai Din

Shaheen Abbas

dekhna hai kab zamin ko ḳhali kar jaata hai din

is qadar aata nahin hai jis qadar jaata hai din

muntashir chaliye ki yuun bazar bhar jaata to hai

mushtahar kiije ki phir achchha guzar jaata hai din

jab zara radd-o-badal hota hai is ta.amir men

bahar aa jaati hai raat andar utar jaata hai din

din ki apni mustaqil koi nahin tariḳh-e-dard

zaḳhm par jaata tha aur ab daagh par jaata hai din

achchhi gunja.ish nikal aati hai shaam aur shor ki

jab khanakte ḳhali insanon se bhar jaata hai din

jaate jaate chhoḌ jaata hai mire dil par lakir

do andheron men mujhe taqsim kar jaata hai din