ali-sardar-jafri

Mere Khwab

ai mire hasin-khvabo

tum kahan se aae ho

kis ufuq se ubhre ho

kis shafaq se nikhre ho

kin gulon ki sohbat men

tum ne tarbiyat paai

kis jahan se laae ho

ye jamal-o-raanai

jel to bhayanak hai

is zalil duniya men

husn ka guzar kaisa

rang hai na nikhat hai

nuur hai na jalva hai

jabr ki hukumat hai

tum kahan se aae ho

ai mire hasin-khvabo

main ne tum ko dekha hai

yaad ab nahin aata

shayad ek ladki ki

thartharati palkon men

jagmagati ankhon men

ya kisi tabassum men

jo naha ke nikla ho

ansuon ki shabnam se

ik humakte bachche ki

mutthiyon ke phulon par

titliyon ki yurish si

aur maan ki nazron men

saikdon umidon ke

shokh rang gul-daste

main ne tum ko dekha hai

nannhi nannhi gudiyon men

nachte khilaunon men

ya rabar ki gendon men

main ne tum ko dekha hai

ghutniyon chale ho tum

totli zabanon se

tum ne duudh manga hai

”ek shah.zada tha

ek shahzadi thi”

is hasin kahani par

jaane kitne bachchon ne

apne sar uthae hain

jaane kitni ankhon men

phuul muskurae hain

aur main samajhta huun

tum isi kahani ki

sar-zamin se aae ho

kuchh kisan kanyaen

sabz o surkh shishon ki

chudiyan kalai men

aur galat ki chandi ki

hansuliyon se gardan men

niim chand ke halqe

choliyon pe lahngon par

zard zard mitti ke

zard bel-bute se

maile maile anchal par

baliyon ke bose hain

un ke haath men hansie

giit gaane lagte hain

jhuum jhuum kar paude

apna sar jhukate hain

nau-javan lathyare

khet ki munderon par

prem giit gaate hain

ai mire hasin-khvabo

tum inhen baharon ki

konpalon se phute ho

ek kar-khane men

chand nau-javanon ne

anjuman banai hai

aur is men lenin ki

ik kitab padhte hain

sun rahi hain divaren

hans rahi hai tariki

nau-javan baithe hain

aur kitab padhte hain

ek ek jumle par

chaunk chaunk padte hain

ek ek fiqre par

apna sar hilate hain

gaah aah bharte hain

gaah muskurate hain

main ne un ke sinon men

ai mire hasin-khvabo

tum ko nachte dekha

main ne tum ko dekha hai

jab siyah mehraben

asman pe banti hain

jab sukut ki pariyan

kahkashan pe chalti hain

gesuon ki nikhat se

jab hava mahakti hain

jab faza chahakti hai

mere garm honton par

pyaar thartharate hain

aur meri mahbuba

apne rang-e-ariz se

bijliyan banati hai

aur meri nazron men

ik jahan mitta hai

ik jahan banta hai

ik zamin hatti hai

ik zamin aati hai

main asiir huun lekin

tum ko koi bhi qanun

qaid kar nahin sakta

sar-buland aur azad

yuun hi muskurae jaao

mere dil ki duniya men

yuun hi jagmagae jaao

qaid-o-band ke jallad

tum ko pa nahin sakte

lambe lambe zalim haath

tum ko chhu nahin sakte

ai mire hasin-khvabo

More Poems

Leave a Comment