Nadi Ko Rok Saki to Dhalan Bandhungi

nadī ko rok sakī to Dhalān bāñdhūñgī

maiñ apnī naav pe ḳhud bādbān bāñdhūñgī

ye abr barsā to dhartī ġhurūb kar degā

maiñ apnī oḌhnī meñ āsmān bāñdhūñgī

maiñ gir ga.ī tirī dastār ko sambhālne meñ

rivāyatoñ ko maiñ shāyān-e-shān bāñdhūñgī

vo mere ghar kī har ik chiiz toḌ detā hai

maiñ dil se dard kī bojhal chaTān bāñdhūñgī

makān girne ko hai maiñ use bachā lūñgī

aur us pe guzrī huī dāstān bāñdhūñgī

chahak parinde kī kilkār nanhe bachche kī

maiñ in ke dam se nayā ik jahān bāñdhūñgī

mujhe najāt dilā de jo mere zindāñ se

na.e safar ke liye jism-o-jān bāñdhūñgī

juḌī rahūñgī usī se zamīn maañ hai mirī

maiñ titliyoñ kī sī dhīmī uḌaan bāñdhūñgī

Leave a Comment