shauq-e-iz.har hai karna bhi nahin chahte hain
apne va.ade se mukarna bhi nahin chahte hain
koi to hai mujhe jiine ki dua deta hai
ham tire ishq men marna bhi nahin chahte hain
tujh se milne ki tamanna bhi bahut hai dil men
tire kuche se guzarna bhi nahin chahte hain
dil ye kahta hai simaT jaaen tiri banhon men
bu-e-gul ban ke bikharna bhi nahin chahte hain
jhankte hain miri ankhon men bacha kar nazren
go ba-zahir vo sanvarna bhi nahin chahte hain
de ke avaz koi rok raha kab se
aur ham hain ki Thaharna bhi nahin chahte hain
log sahil pe khaḌe dhundh rahe hain moti
bahte paani men utarna bhi nahin chahte hain
Leave a Reply