Maher Chand Kausar
a.in-e-asiri ke ye me.aar na.e hain
zindan to vahi hai dar-o-divar na.e hain
iḳhlas makinon ka to dekha nahin ab tak
haan shahr ke sab kucha-o-bazar na.e hain
dushman se to kuchh ḳhauf na ab hai na kabhi tha
Dar ye hai ki ab mere taraf-dar na.e hain
baaqi nahin pahli si vo taqdis-e-mohabbat
ab husn naya us ke parastar na.e hain
pahchan liya ham ne tumhen rah-numao
baten vahi pairaya-e-iz.har na.e hain
sahma hua sannaTa hai maḳhdush faza.en
ab dekh ke chalega ye asar na.e hain
bazar ki raunaq vahi pahli si hai ‘kausar’
itna hai ki is baar ḳharidar na.e hain
Leave a Reply