saf-e-matam bichhi hai
sukhan ka akhiri dar band hone ki khabar ne
khidkiyon ke paar baithe ghamgusaron ko
ye kaisi chup laga di hai
ye kis ki na-gahani maut par sargoshiyon ki aag raushan hai
kisi ke kunj-e-lab se koi taara mere dil par aan padta hai
bura ho maut ka jis ne mire fariyad-ras ki jaan le li hai
abhi us ki zarurat thi
main is duniya ke ik goshe men baitha sochta huun
aaj is viran manDli men
main kis ko pursa dene ke liye aaya huun
mujh ko taaziyat to khud se karna thi
abhi is ghar se ik mayyat sidhari hai
dam-e-rukhsat
kisi ne nik.hat-e-zulf-e-pareshan ka nahin pucha
kisi ne dukh ke andar raushni ki chhab nahin dekhi
makan se phutne vaali ravish par
ek bachcha ro raha hai
aaj us ke an.suon ko kaun ponchhega
ki us ke saath jo shatranj ki baazi lagata tha
vo ab zer-e-zamin ik chadar-e-sada ki khushbu hai
yahan sub.hen bhi aengi
yahan shamen bhi utrengi
magar ik hichkiyan leta hua bachcha
charagh-e-arzu ban kar
sar-e-taq-e-lahad gungi zamin ki lab-kushai tak pukare ga
bura ho maut ka jis ne mire fariyad-ras ki jaan le li hai