Ahmad Shanas
phulon men ek rang hai aankhon ke niir ka
manzar tamam-tar hai ye fasl-e-zamir ka
rishta vo kya hua miri aankhon se niir ka
muddat hui hai hadsa dekhe zamir ka
paani utar gaya to zamin sanglakh thi
tikha sa har saval tha ranjhe se hiir ka
teri azaan ke saath main uthta huun pau phate
sar men liye hue koi sajda asiir ka
dekha na doston ne imarat ke us taraf
puchha kabhi na haal kisi ne faqir ka
aina gir pada tha mire haath se kabhi
phir yaad hadsa nahin koi zamir ka
sahra-e-jism ruuh ke andar utar gaya
ab kya dikhae moajaza insan zamir ka
aansu ki ek buund ko ankhen taras gaiin
is dhuup men jhulas gaya doha kabir ka
aadha falak ke paas tha aadha zamin par
main na-tamam khvab tha badar-e-munir ka
pakke huruf gard ki surat bikhar gae
siine men ghaav rah gaya kachchi lakir ka
hoti rahengi barishen ‘ahmad’ visal ki
khali rahega jaam hamesha faqir ka
Leave a Reply