Aziz Hamid Madni
ek hi shahr men rahte baste kaale koson duur raha
is gham se ham aur bhi haare vo bhi to majbur raha
kaal tha ashkon ka a.ankhon men lekin teri yaad na puchh
kya kya moti main bhi faraham karne par majbur raha
vo aur itna pareshan-ḳhatir rabt-e-ghair ki baat nahin
lekin us ke chup rahne se dil ko vahm zarur raha
ham aaise nakam-e-vafa ke ghol men aakar baiThe ho
duniya ki taqdir badalna jin ka ik dastur raha
husn ki shart-e-vafa jo Thahri tesha o sang-e-giran ki baat
ham hon ya farhad ho aḳhir ashiq to mazdur raha
vaqt ki baat hai yaad aa jaana lekin us ki baat na puchh
yuun to lakhon baten niklin tera hi mazkur raha
ai mere ḳhurshid-e-shabi kya vahm-e-tulu-o-ghurub tujhe
ek tiri gardish aisi thi ḳhana-e-dil be-nur raha
ishq bhi mohr-ba-lab guzra hai duniya ki kya jur.at thi
us ki nichi nazron men bhi aisa saḳht ghurur raha
ham se us ka rabt-e-junun tha ek hansi ki baat si thi
ham ko aḳhir kyuun ye ḳhabt-e-sa.i-e-na-mashkur raha
sub.h se chalte chalte aḳhir shaam hui avara-e-dil
ab main kis manzil men pahuncha ab ghar kitni duur raha
Leave a Reply