shab-e-mahtab bhi apni bhari-barsat bhi apni
tumhare dam-qadam se zindagi thi zindagi apni
yahan pabandi, narazi, jununi baat hai varna
jamal-e-yar se kuchh kam nahin tabindagi apni
mujhe shadabi-e-sahne-e-chaman se ḳhauf aata hai
yahi andaz the jab luuT ga.i thi zindagi apni
tumhara gham ise ashob-e-sarasar bacha.e ga
havaon se bhaḌak uTThi hai sham-e-zindagi apni
magar tum bhi to ik bu-e-gurezan ki tarah nikle
guzarne ko guzar jaati bahar-e-dosti apni
zahir is chashm-e-avval pe yunhi mahsus hota hai
baḌi muddat se hai jaise kisi se dosti apni
Leave a Reply