Qarib Aa Ki KHazana Hun Lal-O-Gauhar Ka

qarīb aa ki ḳhazāna huuñ la.al-o-gauhar kā

hazār ret sahī ret huuñ samundar kā

khilā hai phuul bahut roz meñ muqaddar kā

bas ab na band ho darvāza tere mandar kā

ye rāhe-gāhe kā milnā bhī koī milnā hai

jo ho sake to pata dījiye kabhī ghar kā

tamām-shahr hai hañgāma-e-nashāt meñ gum

magar ye karb ye sannāTā mere andar kā

sadā kisī kī ho aatā hai apne-āp se ḳhauf

maiñ vo ġharīb ki ghar kā rahā na bāhar kā

kabhī na khul ke hañsā huuñ na royā jī-bhar ke

rakhā hai maiñ ne hamesha qadam barābar kā

kabhī kabhī kā ho qissa to koī dukh bhī sune

uThā.e bojh bhalā kaun zindagī-bhar kā

gurez hai use merī galī se yuuñ jaise

yahāñ jo aayā to ho jā.egā vo patthar kā

asīr-e-dām fareb-e-zabāñ huā āḳhir

na e’tibār jise aayā dīda-e-tar kā

ġham-e-zamāna hai vo teġh-e-tishna-kām ‘anjum’

uḌe haiñ paañv agar vaar bach gayā sar kā

Leave a Comment