koThe ujaaḌ khiḌkiyan chup raste udaas
jaate hi un ke kuchh na raha zindagi ke paas
do pal baras ke abr ne dariya ka ruḳh kiya
tapti zamin se pahron nikalti rahi bhaḌas
miTTi ki saundh jaate hue saath le uḌi
Daali ka loch paat ki sabzi kali ki baas
ashkon se kis ko pyaar hai aahon se kis ko uns
lekin ye dil ki jis ko ḳhushi aa saki na raas
hoshyar ai naved-e-ajal luT na ja.iyo
phirta hai koi aTh-pahr dil ke aas paas
aansu ho mai ho zahr ho ab-e-hayat ho
juz ḳhun-e-arzu na mujhe zindagi ki pyaas
jaise kabhi ta.alluq-e-ḳhatir na raha
yuun ruuTh kar chali ga.i ‘shohrat’ har ek aas
Leave a Reply