kabhi qarib kabhi duur ho ke rote hain
mohabbaton ke bhi mausam ajiib hote hain
zihanaton ko kahan vaqt ḳhuun bahane ka
hamare shahr men kirdar qatl hote hain
faza men ham hi banate hain aag ke manzar
samundaron men hamin kashtiyan Dubote hain
palaT chalen ki ghalat aa ga.e hamin shayad
ra.iis logon se milne ke vaqt hote hain
main us dayar men huun be-sukun barson se
jahan sukun se ajdad mere sote hain
guzar dete hain umren ḳhulus ki ḳhatir
purane log bhi ‘az.har’ ajiib hote hain
Leave a Reply