Aqeel Nomani
na sab be-ḳhabar hain na hushyar sab
gharaz ke mutabiq hain kirdar sab
dikhave ki hain saari dilchaspiyan
haqiqat men sab se hain bezar sab
ḳhabar hai koi charagar aa.ega
saliqe se baiThe hain bimar sab
baḌi dhuum hai us ke insaf ki
baḌe mutma.in hain gunahgar sab
sabhi zindagi ke nishane pe hain
Thikane na lag jaa.en is baar sab
bahut saada dil hain bahut nek hain
hamare tumhare madad-gar sab
main ḳhud apna munkir huun phir bhi ‘aqil’
mujhe manne ko hain tayyar sab
Leave a Reply