Na Sab Be-KHabar Hain Na Hushyar Sab

na sab be-ḳhabar haiñ na hushyār sab

ġharaz ke mutābiq haiñ kirdār sab

dikhāve kī haiñ saarī dilchaspiyāñ

haqīqat meñ sab se haiñ bezār sab

ḳhabar hai koī chārāgar aa.egā

salīqe se baiThe haiñ bīmār sab

baḌī dhuum hai us ke insāf kī

baḌe mutma.in haiñ gunahgār sab

sabhī zindagī ke nishāne pe haiñ

Thikāne na lag jaa.eñ is baar sab

bahut saada dil haiñ bahut nek haiñ

hamāre tumhāre madad-gār sab

maiñ ḳhud apnā munkir huuñ phir bhī ‘aqīl’

mujhe mānñe ko haiñ tayyār sab

Leave a Comment