ye hai miri nazron ki munajat ka aalam
zarre bhi dikhate hain samavat ka aalam
pur-nur tire husn se aghosh-e-tasavvur
duuri men bhi hasil hai mulaqat ka aalam
iima ka hai faizan ki ehsas ka ehsan
ek ek jafa men hai mudarat ka aalam
jalvon ki ye kasrat hai ki hairan hain ankhen
a.ine dikhate hain hijabat ka aalam
dil par nahin qaabu to zaban laakh ho bas men
nazron se jhalakta hai ḳhayalat ka aalam
har mauj-e-nafas un ki mahak se hai mo.attar
pinhan hai taghaful men inayat ka aalam
kya zikr-e-suḳhan un ki ḳhamoshi men bhi ‘kaukab’
angḌa.iyan leta hai kinayat ka aalam
Leave a Reply