bichhaḌte vaqt to kuchh us men gham-gusari thi
vo aankh phir to har ik kaifiyat se aari thi
na jaane aaj havaon ki zad pe kaun aaya
na jaane aaj ki shab kis diye ki baari thi
zara si der ko chamki to thi ghanim ki tegh
savad-e-shahr men phir raushni hamari thi
safar se lauTe to jaise yaqin nahin aata
ki saari umr isi shahr men guzari thi
harif tegh se men apni agahi se laḌa
ye adl vaqt kare kis ki zarb kaari thi
dilon ke khel bhi kaise ajiib khel hain ‘shauq’
ki main udaas tha baazi kisi ne haari thi
Leave a Reply