Bahut Mushkil Hai Tark-E-Arzu Rabt-Ashna Ho Kar

Darshan Singh

bahut mushkil hai tark-e-arzu rabt-ashna ho kar

guzar ja vadi-e-pur-ḳhar se bad-e-saba ho kar

laga doge tamanna ke safine ko kinare se

ma.az-allah dava-e-ḳhuda.i na-ḳhuda ho kar

har ik ho silsila rangin gunahon ke salasil ka

nahin asan duniya se guzarna parsa ho kar

miri pinha.i-e-ilm-o-ḳhabar ki intiha ye hai

ki ik qatre se na-vaqif huun dariya-ashna ho kar

kahan tab-e-juda.i ab to ye mahsus hota hai

ki main ḳhud se juda ho ja.unga tum se juda ho kar

tira dar chhoḌ duun lekin tire dar ke siva saaqi

kahan ja.un kidhar ja.un zamane se ḳhafa ho kar

jo shikva un se karna tha vo un ke ru-ba-ru ‘darshan’

zaban tak aate aate rah gaya harf-e-dua ho kar