gae baras ki yahi baat yadgar rahi
faza ghamon ke liye khuub sazgar rahi
agarche faisla har baar apne haq men hua
saza-e-jurm bahar-hal barqarar rahi
badalti dekhin vafadariyan bhi vaqt ke saath
vafa jahan ke liye ek karobar rahi
ab apni zaat se bhi e’timad un ka utha
vo jin ki baat kabhi harf-e-e’tibar rahi
khabar thi go use ab mojaze nahin hote
hayat phir bhi magar mahv-e-intizar rahi
na koi harf-e-malamat na koi kalma-e-khair
ye ziist ab na kisi ki bhi zer-e-bar rahi
ye aur baat ki dil gham men khud kafil hua
magar vo aankh mire gham men ashk-bar rahi
Leave a Reply