vaada-e-vasl aur vo kuchh baat hai
ho na ho is men bhi koi ghaat hai
khalq nahaq darpai-e-isbat hai
hai dahan us ka kahan ik baat hai
bosa-e-chah-e-zankhdan ghair len
duub marne ki ye ai dil baat hai
ghar se nikle ho nihatte vaqt-e-qatl
ye bhi bahr-e-qatl-e-ashiq ghaat hai
main ne itna hi kaha banvao khat
ye bigadne ki bhala kya baat hai
baad muddat bakht jaage hain mire
baithe hain sone ko saari raat hai
kya karun vasf-e-butan-e-khud-pasand
in se badh kar bas khuda ki zaat hai
baton baton men jo main kuchh kah gaya
hans ke farmane lage kya baat hai
harf-e-matlab saaf kah sakta nahin
hai adab maane ki pahli raat hai
mujh se ho izhar-e-ulfat vah-va
aap ke farmane ki ye baat hai
ro rahe hain ham mila de lab se lab
mai-kashi ho saqiya barsat hai
zach hai teri chaal se raftar-e-charkh
mohr-e-rukh se bazi-e-mah maat hai
kaisi katti hai siyah-bakhti men umr
raat se din din se bad-tar raat hai
chhedta hai dil ko kya ai dard-e-hijr
khud giraftar-e-hazar-afat hai
ai ghani de sim-o-zar vaqt-e-bala
mal-e-duniya jaan ki khairat hai
gar jagah dil men nahin phir is se kya
ye doshambe ki ye budh ki raat hai
saaf kah de tu yahan aaya na kar
yaar ye sau baat ki ik baat hai
lakht-e-dil hain mere khane ko ‘amir’
bas inhin tukdon pe ab auqat hai