masrur bhi huun ḳhush bhi huun lekin ḳhushi nahin
tere baghair ziist to hai zindagi nahin
main dard-e-ashiqi ko samajhta huun jan-o-ruh
kambaḳht vo bhi dil men kabhi hai kabhi nahin
la gham hi Daal de mire dast-e-saval men
main kya karun ḳhushi ko jo teri ḳhushi nahin
kuchh der aur rahne de ḳhuddari-e-junun
daman to chaak hona hai lekin abhi nahin
saaqi nigah-e-naz se lillah kaam le
sau jaam pi chuka huun magar be-ḳhudi nahin
rakhna paḌegi tum ko tahi-damani ki laaj
mujh ko kami zarur hai tum ko kami nahin
‘bahzad’ saaf saaf main kahta huun hal-e-dil
sharminda-e-kamal miri sha.iri nahin
Leave a Reply