ye ḳhud ko dekhte rahne ki hai jo ḳhu mujh men
chhupa hua hai kahin vo shagufta-ru mujh men
mah o nujum ko teri jabin se nisbat duun
ab is qadar bhi nahin adat-e-ghulu mujh men
taghayyurat-e-jahan dil pe kya asar karte
hai teri ab bhi vahi shakl hu-ba-hu mujh men
rafugaron ne ajab tab.a-azma.i ki
rahi sire se na gunja.ish-e-rafu mujh men
vo jis ke samne meri zaban nahin khulti
usi ke saath to hoti hai guftugu mujh men
ḳhuda kare ki use dil ka rasta mil jaa.e
bhaTak rahi hai koi chaap ku-ba-ku mujh men
us ek zohra-jabin ke tufail jaari hai
tamam zohra-jabinon ki justuju mujh men
nahin pasand mujhe sher-o-sha.eri karna
kabhi-kabhar bas uThti hai ek hu mujh men
main zindagi huun mujhe is qadar na chaah ‘shu.ur’
musafirana iqamat-guzin hai tu mujh men
Leave a Reply