Shahida Majeed
aaj mauqa hai jo kahna hai miri jaan kahiye
phir na shayad ho kabhi vaqt mehrban kahiye
itni qabren hain umidon ki mire dil men ki ab
shahr-e-dil ko bhi mire shahr-e-ḳhamoshan kahiye
yuun to is shahr men sab dost hain apne lekin
kis ko hamdard kise dard ka darman kahiye
tirgi raton ki jheli hai ki aa.egi kabhi
sub.h ik aisi jise sub.h-e-daraḳhshan kahiye
sahte aa.e hain sitam aap ke hanste hue ham
aur bhi dil men agar ho koi arman kahiye
dhund phailegi udasi ki abhi duur talak
hijr ki rut hai jise fasl-e-zamistan kahiye
kis ke ḳhvabon se saja rakkhi hain ankhen apni
kis ki ḳhatir hai ye palkon pe charaghan kahiye
Leave a Reply