Shmashad Shad
jahalaton ki ghulami se bach nikalne ka
sanbhal bhi jaao yahi vaqt hai sanbhalne ka
bulandiyan bhi karengi salam jhuk ke tumhen
shu.ur tum men agar hai zamin pe chalne ka
jo na-umidi ke badal falak pe chha.e hon
tum intizar karo barf ke pighalne ka
niDhal ho ke lo suraj bhi mahv-e-ḳhvab hua
ai chand taaro yahi vaqt hai nikalne ka
main vo charagh huun jis men hai azm ka indhan
nahin hai ḳhauf mujhe andhiyon ke chalne ka
shafaq ke saa.e men din-rat mil rahe hain gale
baḌa hasin hai manzar ye shaam Dhalne ka
har ik saval ka ma.aqul do javab ki ‘shad’
nahin ye vaqt ḳhamoshi se haath malne ka
Leave a Reply