Na Usko Bhul Pae Hain Na Humne Yaad Rakkha Hai

na us ko bhuul paa.e hain na ham ne yaad rakkha hai

dil-e-barbad ko is tarha se abad rakkha hai

jhamele aur bhi suljhane vaale hain ka.i pahle

aur us ke vasl ki ḳhvahish ko sab se baad rakkha hai

ruka rahta hai charon samt ashk o aah ka mausam

ravan har lahza karobar-e-abr-o-bad rakkha hai

phir is ki kamyabi ka koi imkan hi kya ho

agar us shoḳh par daava hi be-buniyad rakkha hai

ḳhizan ke ḳhushk patte jis men din-bhar khaḌkhaḌate hain

isi mausam ka naam ab ke bahar-ijad rakkha hai

ye kya kam hai ki ham hain to sahi fahrist men us ki

bhale na-shad rakkha hai ki ham ko shaad rakkha hai

jise lafz-e-mohabbat ke ma.ani tak nahin aate

use apne liye ham ne yahan ustad rakkha hai

javab apne ko chahe jo bhi vo malbus pahna.e

saval is dil ne us ke aage madar-zad rakkha hai

‘zafar’ itna hi kaafi hai jo vo raazi rahe ham par

kamar apni pe koi bojh ham ne laad rakkha hai