na-qabil-e-bayan ḳhataon se Dar ga.e
ye bhi hua hai log duaon se Dar ga.e
kya kya guman na the hamen divar-o-dar ke biich
uncha.iyon pe ja ke ḳhalaon se Dar ga.e
majme.a men kar rahe the jo be-ḳhaufiyon ki baat
tanha hue to apni sadaon se Dar ga.e
chingariyon ke khel men daman jala liya
bhaḌki jo aag tez havaon se Dar ga.e
din kya chaḌha ki ho liye suraj ke saath saath
suraj-mukhi ke phuul shuaon se Dar ga.e
maa.il na dil hua kabhi insaf ki taraf
qaazi badan ki apni qabaon se Dar ga.e
har har ḳhata ko sarf-e-nazar kar diya gaya
zalim ye sun ke apni sazaon se Dar ga.e
ham tark-e-mai-kashi ka irada na kar sake
mausam ki ḳhunkiyon se ghaTaon se Dar ga.e
‘nashir’ hamen bachata raha hai ḳhuda ka ḳhauf
Dhale hue ḳhud apne ḳhudaon se Dar ga.e
Leave a Reply