duur ke jalvon ki shadabi ka dil-dada na ho
tu jise dariya samajhta hai kahin sahra na ho
aa.ine ko ek muddat ho ga.i dekhe hue
vo jabin-e-shauq jis par soch ka saaya na ho
vo bhi mere paas se guzra usi andaz se
main ne bhi zahir kiya jaise use dekha na ho
is taraf kya turfa aalam hai ye khul sakta nahin
aadmi ka qad agar divar se uncha na ho
maslahat chahe rahun Daale tasanno ka naqab
dosti ki maang chehre par koi parda na ho
dhuup se ghabra ke baiTha to hai lekin dekh le
ye kisi girti hui divar ka saaya na ho
qahqahon ki chhanv men ik shaḳhs baiTha hai udaas
vo bhi meri hi tarah is bhiiḌ men tanha na ho
‘sabir’ in manus galiyon se to dil ukta gaya
aa chalen is shahr men pahle jaise dekha na ho
Leave a Reply