Ushshaq Tere Sab The Par Zar Tha So Main Tha

Poet

ushshaq tere sab the par zaar tha so main tha

jag ke kharaba andar ik khvar tha so main tha

dakhil shahidon men to lohu laga ke sab the

shamshir-e-naz se pur-afgar tha so main tha

sumbul ke pech men dil tere na tha kisi ka

nargis ka ek teri bimar tha so main tha

tujh ghar men arz-e-matlab kis ki na tha zaban par

dar par jo tere naqsh-e-divar tha so main tha

dagh-e-mohabbat ai gul jab tha tira na jag men

daghon se jis ka siina gulzar tha so main tha

go ishq ke tumhare ushshaq ab muqir hain

avval zaban pe jis ki iqrar tha so main tha

tujh ishq men nasihat sab yaar mante the

naseh ke par sukhan se be-zar tha so main tha

is mai-kade men gaahe ai ‘soz’ ham na bahke

sab mast o be-khabar the hushyar tha so main tha