Raat Main Shana-E-Idrak Se Lag Kar Soya

Rafi Raza

raat main shana-e-idrak se lag kar soya

band ki aankh to aflak se lag kar soya

unghta tha kahin mehrab ki sarshari men

ik diya sa kisi chaqmaq se lag kar soya

ek jalta hua aansu jo nahin sota tha

der tak dida-e-namnak se lag kar soya

an-ginat ankhen mire jism pe chundhya.i rahin

buqa-e-nur miri ḳhaak se lag kar soya

kuza-gar ne mire baare men ye daftar men likha

chaak se utra magar chaak se lag kar soya

niind ki shart thi tanha nahin sona mujh ko

hijr tha so usi saffak se lag kar soya

raat kanTon pe guzari to savere socha

kis liye ḳhema-e-ushshaq se lag kar soya

niind suuli pe chali aa.i sau zaḳhm-e-uryan

apni ik ḳhvahish-e-poshak se lag kar soya