nigah-e-yar jise ashna-e-raz kare
vo apni ḳhubi-e-qismat pe kyuun na naaz kare
dilon ko fikr-e-do-alam se kar diya azad
tire junun ka ḳhuda silsila daraz kare
ḳhirad ka naam junun pad gaya junun ka ḳhirad
jo chahe aap ka husn-e-karishma-saz kare
tire sitam se main ḳhush huun ki ghaliban yuun bhi
mujhe vo shamil-e-arbab-e-imtiyaz kare
gham-e-jahan se jise ho faragh ki ḳhvahish
vo un ke dard-e-mohabbat se saz-baz kare
ummid-var hain har samt ashiqon ke giroh
tiri nigah ko allah dil-navaz kare
tire karam ka saza-var to nahin ‘hasrat’
ab aage teri ḳhushi hai jo sarfaraz kare