kahan main ja.un gham-e-ishq-e-ra.egan le kar
ye apne ranj ye apni udasiyan le kar
jala hai dil ya koi ghar ye dekhna logo
hava.en phirti hain charon taraf dhuan le kar
bas ik hamara lahu sarf-e-qatl-gah hua
khaḌe hue the bahut apne jism o jaan le kar
na.e gharon men na rauzan the aur na mehraben
parinde lauT ga.e apne ashiyan le kar
samundaron ke safar jin ke naam likkhe the
utar ga.e vo kinaron pe kashtiyan le kar
talash karte hain nau-saḳhta makanon men
ham apne ghar ko purani nishaniyan le kar
unhen bhi sahne paḌe the azaab mausam ke
chale the apne saron par jo sa.eban le kar
hava men hilte hue haath puchhte hain ‘zubair’
tum ab ga.e to kab aaoge chhuTTiyan le kar
Leave a Reply