mai-kade men jo tire husn ka mazkur hua
sang-e-ghairat se mira shisha-e-dil chuur hua
ek to aage hi tha husn par apne nazan
a.ina dekh ke vo aur bhi maghrur hua
sub.h hote hi hua mujh se juda vo mah-ru
roz goya mire haq men shab-e-dijur hua
tegh mat khinch ki ek jumbish-e-abru bas hai
gar mira qatl hi zalim tujhe manzur hua
az-pa.e-dagh-e-dil-e-bada-parastan ‘bedar’
pumba-e-shisha-e-mai marham-e-kafur hua
Leave a Reply