ahmad-faraz

Dil Badan Ka Sharik-E-Haal Kahan

dil badan ka sharik-e-hal kahan

hijr phir hijr hai visal kahan

ishq hai naam intihaon ka

is samundar men e’tidal kahan

aisa nashsha to zahr men bhi na tha

ai gham-e-dil tiri misal kahan

ham ko bhi apni paemali ka

hai magar is qadar malal kahan

main nai dosti ke mod pe tha

aa gaya hai tira khayal kahan

dil ki khush-fahm tha so hai varna

tere milne ka ehtimal kahan

vasl o hijran hain aur duniyaen

in zamanon men mah-o-sal kahan

tujh ko dekha to log hairan hain

aa gaya shahr men ghazal kahan

tujh pe likkhi to saj gai hai ghazal

aa mila khvab se khayal kahan

ab to shah maat ho rahi hai ‘faraz’

ab bachav ki koi chaal kahan

More Poems

Leave a Comment