Prem Kumar Nazar
tabibo charagaro tum se jo hua so hua
hamare dam pe bharosa rakho hua so hua
vo apne haal men ḳhush hai ham apne haal pe ḳhush
ab is ka zikr na yaaro karo hua so hua
bahut hua to vahi hoga jis ka Dar hai hamen
jo ho raha hai vo hone do jo hua so hua
abas hai kasrat-e-kar-e-junun bhi aise men
azizo chak-e-gareban siyo hua so hua
koi bhi surat-e-ahval ko na janega
jo dil ki baat hai dil men rakho hua so hua
saba ke bas men nahin ab payam-e-sub.h-e-visal
dayar-e-hijr ke zindaniyo hua so hua
kahen hain reḳhta punjab men nazar-sahib
ba-qadr-e-zauq tum un ki suno hua so hua
Leave a Reply