Tilok Chand Mahroom
shahr se ek taraf duur bahut
aaj roya dil-e-mahjur bahut
duur hai sub.h shab-e-gham ai dil
hai sitaron main abhi nuur bahut
kis ko manzur tha rusva hona
dil ke hathon hue majbur bahut
maut ayyam-e-javani men bhi
nazar aati thi magar duur bahut
munhasir vadi-e-sina pe nahin
jazb-e-musa ho agar tuur bahut
ek hi vaar ke qabil nikla
yuun to kahne ko hain mansur bahut
tum ko kis ranj ne maara ‘mahrum’
ki nazar aate ho ranjur bahut
Leave a Reply