Farhan Salim
mire charagho mira ganj-e-be-karan le lo
main ja raha huun miri raushni-e-jan le lo
qarib hai mire ḳhaki libas ki tahlil
mire dimagh mire dil miri zaban le lo
hai meri ankhon men aks-e-navishta-e-divar
samajh sako to mira nutq-e-be-e-zaban le lo
miri jabin pe munaqqash hain raston ke charagh
bhaTak na jaao ye dastur-e-chistan le lo
rahin-e-dasht huun sahra ka raz-dan huun main
rumuz-e-dasht bayaban ki boliyan le lo
huun vardat ka aini gavah main mujh se
ye meri maut se pahle mira bayan le lo
Leave a Reply