jahan-zad
vo halab ki karvan-saraa ka hauz, raat vo sukut
jis men ek dusre se ham-kinar tairte rahe
muhit jis tarah ho daere ke gird halqa-zan
tamam raat tairte rahe the ham
ham ek dusre ke jism o jaan se lag ke
tairte rahe the ek shad-kam khauf se
ki jaise paani ansuon men tairta rahe
ham ek dusre se mutmain zaval-e-umr ke khilaf
tairte rahe
tu kah uthi ‘hasan yahan bhi khinch laai
jaan ki tishnagi tujhe!’
(lo apni jaan ki tishnagi ko yaad kar raha tha main
ki mera halq ansuon ki be-baha sakhavaton
se shad-kam ho gaya!)
magar ye vahm dil men tairne laga ki ho na ho
mira badan kahin halab ke hauz hi men rah gaya
nahin, mujhe dui ka vahima nahin
ki ab bhi rabt-e-jism-o-jan ka e’tibar hai mujhe
yahi vo e’tibar tha
ki jis ne mujh ko aap men samo diya
main sab se pahle ‘aap’ huun
agar hamin hon tu ho aur main huun phir bhi main
har ek shai se pahle aap hon!
agar main zinda huun to kaise aap se dagha karun?
ki tere jaisi aurten, jahan-zad,
aisi uljhanen hain
jin ko aaj tak koi nahin ‘sulajh’ saka
jo main kahun ke main ‘sulajh’ saka to sar-ba-sar
fareb apne aap se!
ki auraton ki sakht hai vo tanz apne-ap par
javab jis ka ham nahin
(labib kaun hai? tamam raat jis ka zikr
tere lab pe tha
vo kaun tere gesuon ko khinchta raha
labon ko nochta raha
jo main kabhi na kar saka
nahin ye sach hai main huun ya labib ho
raqib ho to kis liye tiri khud-agahi ki be-riya nashat-e-nab ka
jo sad-nava o yak-nava khiram-e-subh ki tarah
labib har nava-e-saz-gar ki nafi sahi!)
magar hamara rabta visal-e-ab-o-gil nahin, na tha kabhi
vajud-e-admi se ab-o-gil sada barun rahe
na har visal-e-ab-o-gil se koi jaam ya subu hi ban saka
jo in ka ek vahima hi ban sake to ban sake!
jahan-zad
ek tu aur ek vo aur ek main
ye tiin zaviye kisi musallas-e-qadim ke
hamesha ghumte rahe
ki jaise mera chaak ghumta raha
magar na apne-ap ka koi suragh pa sake
musallas-e-qadim ko main tod, duun jo tu kahe, magar nahin
jo sehr mujh pe chaak ka vahi hai is musallas-e-qadim ka
nigahen mere chaak ki jo mujh ko dekhti hain
ghumte hue
subu-o-jam par tira badan tira hi rang teri nazuki
baras padi
vo kimiya-gari tire jamal ki baras padi
main sail-e-nur-e-andrun se dhul gaya!
mire daron ki khalq yuun gali gali nikal padi
ki jaise subh ki azaan sunai dii!
tamam kuuze bante bante ‘tuu’ hi ban ke rah gae
nashat is visal-e-rah-guzar ki na-gahan mujhe nigal gai
yahi pyala-o-surahi-o-subu ka marhala hai vo
ki jab khamir-e-ab-o-gil se vo juda hue
to un ko samt-e-rah-e-nau ki kamraniyan milen
main ik gharib kuza-gar
ye intiha-e-marifat
ye har pyala-o-surahi-o-subu ki intiha-e-marifat
mujhe ho is ki kya khabar?
jahan-zad
intizar aaj bhi mujhe hai kyuun vahi magar
jo nau baras ke daur-e-na-saza men thaa?
ab intizar ansuon ke dajla ka
na gumrahi ki raat ka
shab-e-gunah ki lazzaton ka itna zikr kar chuka
vo khud gunah ban gain!
halab ki karvan-sara ke hauz kaa, na maut ka
na apni is shikast-khurda zaat ka
ik intizar-e-be-aman ka taar hai bandha huaa!
kabhi jo chand saniye zaman-e-be-zaman men aa ke ruk gae
to vaqt ka ye baar mere sar se bhi utar gaya
tamam rafta o guzishta surton, tamam hadson
ke sust qafile
mire darun men jaag uthe
mere darun men ik jahan-e-baz-yafta ki rel-pel jaag uthi
bahisht jaise jaag uthe khuda ke la-shuur men!
main jaag utha ghunudgi ki ret par pada hua
ghunudgi ki ret par pade hue vo kuuze jo
mire vajud se barun
tamam reza reza ho ke rah gae the
mere apne-ap se firaq men
vo phir se ek kul bane (kisi nava-e-saz-gar ki tarah)
vo phir se ek raqs-e-be-zaman bane
vo ruyat-e-azal bane!
Leave a Reply