sayyargan ki shab men zamin sa diya to hai
ye khaak ajnabi sahi rahne ki ja to hai
avargi ka bojh tha is khaak par bahut
lekin hazar shukr ki ham se utha to hai
ye arsa-e-hayat agarche hai kam magar
paanv kisi maqam par aa kar ruka to hai
maalum hai mujhe ki tamasha to kuchh nahin
lekin hujum men kahin tu bhi khada to hai
galiyon ka shor-o-ghul hai mire saath aaj bhi
vo din guzar gae magar avaz-e-pa to hai
vo rahguzar mahakti hai khush huun ye jaan kar
gar main nahin to kya hai koi dusra to hai
ye bhi maal-e-khvahish-e-dil hai ki aaj vo
badal ko dekh kar sahi chhat par chadha to hai
aa jaega ‘naved’ vo ik roz raah par
achchha hai apni raah se bhatka hua to hai
Leave a Reply