Neelma Naheed Durrani
aisa chehra mire bhi dhyan men tha
jo zamin men na asman men tha
dil to ḳhali paḌa tha sadiyon se
ek saaya mire makan men tha
mujh men shamil tha vo lahu ki tarah
aankh men dil men aur jaan men tha
naam kya tha jo itna shirin tha
za.iqa ab bhi is zaban men tha
dhund phaili hui thi charon taraf
shor hi shor is jahan men tha
vo jo rahta tha saath sham-o-sahar
is zaman men na us zaman men tha
meri ankhon ne jo bhi dekha tha
sher men nazm men bayan men tha
main bhi apni ana men qaid rahi
vo bhi kuchh apni aan baan men tha
Leave a Reply