mire vajud ke dozaḳh ko sard kar dega
agar vo abr-e-karam hai to khul ke barsega
gila na kar ki hai aghaz-e-shab abhi pyare
Dhalegi raat to ye dard aur chamkega
qadah ki ḳhair sunao ki ab ke barish-e-sang
agar hui to tarab-zar-e-shab bhi Dubega
ye shahr-e-kam-nazaran hai idhar na kar ankhen
yahan ishara-e-mizhgan koi na samjhega
main us badan men utar ja.unga nashe ki tarah
vo ek baar agar phir palaT ke dekhega
ravan to huun su-e-aflak-e-arzu lekin
ye zor-e-mauj-e-hava bazuon ko toḌega
agar hai shauq-e-asiri to muund le ankhen
tu umr bhar dar-o-divar bhi na dekhega
talash-e-qafila-e-zindagi hai ab be-sud
ye rah-guzar-e-nafas par kahin na Thahrega
na aankh men koi jumbish na paanv par koi gard
jahan se itna bhi mohtat kaun guzrega
rahegi dil men na jab koi bhi ḳhalish ‘mohsin’
bhula chuka hai jise tu use pukarega
Leave a Reply