koi us sitamgar ko agah kar de ki baaz aa.e azar dene se jhaT-paT
udhar ki idhar aaj hoti hai duniya mariz-e-mohabbat badalta hai karvaT
kabhi parda-dari kabhi ḳhud-numa.i kabhi kuchh rukavaT kabhi kuchh lagavaT
tumhari ye charon ada.en ghazab hain ye charon karengi hazaron ko chaupaT
qayamat na uTThe ki uTThe jahan men magar bil-yaqin main to uTThunga jhaT-paT
tah-e-qabr jis vaqt mujh ko milegi sar-e-qabr kuchh un ke qadmon ki aahaT
koi kis tarah is ko taslim kar le ki donon akele basar kar rahe hain
tire gird teri adaon ka majma.a miri hasraton ka mire paas jamghaT
ḳhuda jaane aapas men kya pesh aa.e ye taḳhir-o-tajil kya rang laa.e
hamara irada ki fauran na den dil tumhari tamanna ki mil jaa.e jhaT-paT
kahan lutf-e-bazm-e-masarrat uThaya kahan daur-e-pur-kaif guzre nazar se
mai-e-nab auron ke hisse men aa.i hamare muqaddar men thi sirf talchhaT
udhar vo bhi sargarm-e-zulm-o-jafa hai idhar ham bhi masruf-e-ah-o-buka hain
kahin baḌhte baḌhte na baḌh jaa.e jhagḌa kahin hote hote na ho jaa.e khaTpaT
ye kyuun hai ta.ammul ye kyuun hai tavaqquf ye inkar kya hai ye aghmaz kya hai
laḌao bhi ankhen milao bhi nazren dikhao bhi mukhḌa uThao bhi ghunghaT
bahut kuchh chhupaya bahut kuchh bachaya magar pesh-bandi na kuchh kaam aa.i
kiye ḳhanjar-e-naz ne chaar TukḌe bil-aḳhir hua dil mohabbat men chaupaT
mohabbat men ye jhiḌkiyan bhi abas hain ye har vaqt ki dhamkiyan bhi abas hain
karam ho ki mujh par sitam ho tumhara na uTThunga dar se na chhoḌunga chaukhaT
bayan-e-tamanna suna aur sun kar baḌi der se ghaur farma rahe hain
na a.enge ya mere ghar aa ga.e vo jo hona ho irshad ho jaa.e jhaT-paT
sitam bhi uTha.e hazaron tarah ke bala.en bhi jhelin hazaron tarah ki
hua tajraba ham ko ye dil laga kar hasinon se dil ka lagana hai jhanjhaT
tire ishq men kyuun na main dil ko ro.uun jigar ke liye kyuun na main aah khinchun
shab-o-roz ki muḳhtalif afaton ne ise kar diya chit use kar diya paT
bana ghairat-e-a.ina dil hamara ghubar aa.e kyuun kar kudurat rahe kya
masal hai vo ḳhas-kam jahan paak vaali na is ghar men kuuḌa na us ghar men karkaT
mohabbat ke raste men ai shauq-e-manzil milega ajab lutf pa-e-talab ko
udhar ḳhaar hain aur idhar aable hain agar nazr haan vo hain to ye hain munh-phaT
tire ishq men chain se kya rahun main tire ishq men jab na de chain mujh ko
nazar ka palaTna zaban ka badalna muqaddar ki gardish zamane ki karvaT
ye ai ‘nuh’ kis ne tumhen raa.e di thi ki tufan uThao zamin-dar ho kar
ab achchha tamasha nazar aa raha hai tah-e-ab khata sar-e-ab khevaT
Leave a Reply