Sufi
sar Takraen jis se vo divar kahan
jism kahan aur ruuh ka ye azar kahan
tanhai ka kab ye aalam tha pahle
chhuT gae hain mujh se mere yaar kahan
andhe shahar ke sab aine andhe hain
aise men ḳhud apna bhi didar kahan
TuuTi TuuTi chand shabihen baaqi hain
dil men ab yadon ka vo ambar kahan
mere andar mujh se laḌta hai koi
is paikar men jiit kahan aur haar kahan
ruuh do-nim aur jism bhi hai reza reza
ḳhaak uḌata phirta hai pindar kahan
kyuun ye kashti dol rahi hai lahron par
TuuTa hai is kashti ka patvar kahan
Leave a Reply