raat andar utar ke dekha hai
kitna hairan-kun tamasha hai
ek lamhe ko sochne vaala
ek arse ke baad bola hai
mere baare men jo suna tu ne
meri baton ka ek hissa hai
shahr valon ko kya ḳhabar ki koi
kaun se mausamon men zinda hai
ja basi duur bhaa.i ki aulad
ab vahi dusra qabila hai
baanT lenge na.e gharon vaale
is haveli ka jo asasa hai
kyuun na duniya men apni ho vo magan
us ne kab asman dekha hai
aḳhiri tajziya yahi hai ‘malal’
aadmi da.eron men rahta hai
Leave a Reply