Hasan Naim
yahi to gham hai vo sha.ir na vo siyana tha
jahan pe ungliyan kaTti thiin sar kaTana tha
mujhe bhi abr kisi koh par ganva deta
main bach gaya ki samundar ka main ḳhazana tha
tamam log jo vahshi bane the aaqil the
vo ek shaḳhs jo ḳhamosh tha divana tha
pata chala ye havaon ko sar paTakne par
main reg-e-dasht na tha sang-e-sad-zamana tha
tamam sabza-o-gul the mulazim-e-mausam
kali ka farz hi gulshan men muskurana tha
mire liye na ye masti na agahi hai haram
mujhi ko bazm se uThna tha sar uThana tha
vo mere haal se mujh ko parakh rahe the ‘hasan’
miri nigah men guzra hua zamana tha
Leave a Reply