rasm-e-duniya jaan kar hargiz na yarana karo
dosti ke baab men dil ka kaha maana karo
ek dhima sa tabassum rasm hi si ban gaya
dosto apne para.e ko to pahchana karo
raushni ka qaht hai par fikr-e-farda kis liye
ḳhuun ki tanvir se raushan siyah-ḳhana karo
chhoTi-moTi baat ho to jins-e-gham dete raho
jurm ho sangin to ḳhushiyon ka jurmana karo
rasm-e-shabbiri davam-e-zist hai sultan-‘rashk’
ziist karni hai agar to sarfaroshana karo
Leave a Reply